Feeds:
Artigos
Comentarios

Archive for the ‘música’ Category

Desde o ano 2011 existe Xardín Desordenado, un grupo de cinco músicos comprometidos en divulgar, coa axuda da música, a poesía en galego. Teñen tres cd no mercado: un con composicións de poetas, outro de poetisas e, recentemente, publicaron un cd con música sobre textos de Carlos Casares: o autor homenaxeado este ano coas Letras Galegas.

Se escoitamos con atención a súa música podemos entender quizais a razón do seu nome: Xardín Desordenado. Un nome moi evocador: “Xardín”, quizais porque a súa música é pracenteira como pasearmos por un xardín mais a sensación que transmite a súa música non é de desorde. En absoluto é desordenada. Un xardín desordenado suxire abandono, despreocupación, incluso no peor dos casos: caos, porén cada canción composta por Santiago Ferragud é un exemplo de orde e harmonía. Non hai nada excesivo, esaxerado nin menos aínda hai sensación de insuficiencia. Escoitando con atención os seus cd a palabra desordenado evoca a variedade de estilos que utilizan para intensificar a emoción que transmiten as letras das súas cancións. En Xardín Desordenado hai flores que soan a blues, jazz, bossa nova, tango, fado. Xardín Desordenado é un Xardín Botánico.

Con todos vostedes Xardín Desordenado…

Este foi o texto de presentación do grupo antes do seu concerto no instituto. Pouco que engadir, só que estiveron moi ben e están nas lista dos que sempre que poidamos contar con eles volverán. Un luxo que desde aquí recomendamos a todos.

Compartimos dúas cancións. A primeira nun país normalizado sería unha canción en boca de miles de adolescentes. A min tráeme a memoria éxitos de Grease mais o autor di que lle trae á memoria o son do mellor Dúo Dinámico. Sexa unha cousa ou outra é unha canción fresca, divertida e optimista.

Agora un himno. Sobre un texto de Casares, Xardín Desordenado compuxo este arenga para que ollemos o futuro con esperanza. Outra xoia máis para a Historia da Música en galego.

Advertisements

Read Full Post »

Logo de algún tempo subimos por fin o concerto. Está practicamente íntegro. Respectamos a vontade dos músicos e só compartimos un fragmento da obra máis longa: marimba espiritual. A demora en subirmos os vídeos débese á espera do permiso dos músicos e que chegou o verán e non todo saiu como pensabamos. En fin xa todo está arranxado e todos podemos outra vez gozar do concerto.
Moitas grazas aos músicos: Naira Pérez, Agustín Rodríguez de Guzman, Jesús Álvarez, Fernando Vidal e ao seu profesor: Carlos Castro por aceptaren a nosa invitación. Un luxo que nos enorgullece ciber-compartir.

O primeiro é a obra de percusión “5 Historias”:

O segundo é a súa versión de Good cup, Bad cup:

O tercerio é o fragmento de “Marimba Spiritual”. (puro espectáculo)

Por último moita alegría. Unha Batucada para nós:

Read Full Post »

Velaquí unha mostra dos traballos feitos ao longo de diferentes cursos. Unha parte importante está feita coa colaboración do Departamento de Plástica do Instituto baixo o tema da Música no Cine. E como a cousa vai de música o equipo responsábel do Obradoiro de Edición de Vídeo sentiuse obrigado a poñer un fondo sonoro. Milladoiro ten feitas importantes composicións para bandas sonoras, Muxicas ou Berrogüetto pero todos estes son grupos xa moi coñecidos e recoñecidos, aínda que estes dous últimos xa non están xuntos. Houbo unha unanimidade en que, xa que este blog cada vez ten máis seguidores e repercusión, estaría ben utilizar esta oportunidade para promocionarmos unha banda moi pouco coñecida pero fundamental na Historia do Rock Galego: Zënzar.

Non se senten cómodos clasificados dentro do Rock Bravú porque xa existían antes. Din que facían Rock Pelouro. Escollemos este tema “caneando ruainas” pola súa calidade e orixinalidade. Está cantado en barallete: unha das moitas xirias secretas que existiron no país. Aquí tedes a letra e unha tradución aproximada. Nos esquezades que aínda que existen dicionarios segue a ser unha xiria secreta e son moi poucos os coñecedores dos seus misterios.

Read Full Post »

Alfonso Davila foi alumno do noso instituto. Sempre xeneroso non puxo dificultades para acudir á celebración do aniversario. Durante o seu derradeiro ano no centro a piques estivemos de velo compartir escenario con Sonia Lebedynski. Non puido ser porque a cantante tivo a última hora un compromiso e tivemos que suspender o acto. Esta vez falamos con Jaime Vilas para un dúo e velaquí tedes o resultado.

Alfonso logo de acabar os seus estudo no noso instituto logrou ser o primeiro invidente Técnico de Son de toda Europa

Read Full Post »

O departamento de Matemáticas animou o alumnado de 3º da Eso a contruír un triángulo de Sierpinski con latas de refresco. Bonito xeito de lle dar unha vida útil e intelixente ao lixo. Ao longo do proceso o noso vídeo artista Luís D. foi fotografando o proceso para ao final facermos a montaxe que vos amosamos. Debemos engadir que nos pareceu unha boa idea utilizar como banda sonora unha peza de música fractal. De sempre, xa desde tempos de Pitágoras as grandes mentes viron na música unha especial relación coas matemáticas o que levou a moitos pensadores algo máis místicos a considerar a música como a arte máis perfecta xa que na súa natureza demostraba conter a perfección das matemáticas.

Para os máis curiosos deixamos o froito dalgunha mente marabillosa coma esta que para se lembrar de toda a sucesión de decimais do número Pi compuxo unha melodía en que cada nota se corresponde con cada un dos decimais presentes na cadea. Se sabedes de teoría musical e armonía velaquí tedes outro vídeo sobre a relación entra a música e a sucesión de Fibonacci

Read Full Post »

Este é un corte do concerto que Sonia Lebedynski deu no Ies de Beade de Vigo para celebrarmos o noso 25º aniversario e a despedida dunha promoción de 2º de Bacharelato moi especial. Podemos ver a Sonia interpretando unha versión da famosa canción composta por Emilio Batallán sobre letra de Curros Enríquez e que leva por título A Rosalía. Coa guitarra acompáñaa Gabriel Ribeiro, profesor de guitarra na Escola de Música de Boiro e integrante da banda SuperSandwich.

Sonia Lebedynski tivo o seu primeiro contacto coa música aos sete anos cando inicia os seus estudios musicais de canto. No ámbito artístico desenvólvese dende os seus comezos na música Folk, tendo algún contacto tamén con outras músicas como o funky ou clásica. Ten colaborado en numerosos proxectos como Son Delas, Ball Cans, Sete Saias, Asociación Cultural Barbantía, Conservatorio Tradicional e Folque de Lalín e grabado para diversos discos como Fia na Roca, Susana Seivane, Camaxe, Seare, Asociación Galega de Gaiteiros Galegos (Pelogato24), Brañas Folk ou o último disco do pianista Enrique Paisal (Los Tamara) onde colabora en dous temas… Participou no filme do grupo canadiense “La Bottine Souriante” sobre a súa xira europea con motivo do seu 25 aniversario para o cal interpreta a dúo un tema co cantante solista da “Bottine” Yves Lambert. Formaba parte do grupo Fia na Roca co que grabou tres discos. Agora está a preparar a súa obra en solitario. No ámbito docente actualmente é Mestra en Educación Musical e pedagoga, imparte clases de música na ensinanza primaria, e Música para adultos na Escola de Música Municipal de Boiro. Ademáis imparte cursos de canto por diversos puntos da xeografía galega.

Read Full Post »

Co gallo do noso 25º aniversario logramos contactar con Sonia Lebedynski para que celebrase connosco a despedida dunha promoción especial. Este ano despedimos unha xeración de alumnado máis despois de vintecinco anos. A ocasión merecía contar coa colaboración dunha artista de calidade e proxección internacional e non desaproveitamos a oportunidade para facer a Sonia unha entrevista porque somos moitos os seguidores de Fía na Roca e poucas as oportunidades de sabermos polos seus intregrantes das peripecias do grupo. Moi amabelmente Sonia respondeu a algunhas preguntas. Seguro que para moitos insuficientes mais estou seguro xa haberá outras ocasións en que poidamos falar con ela un pouquiño máis. Non renunciamos a que nos devolva a visita porque nos soubo moi a pouco. Se queredes saber do que falamos aquí tedes un anaco do concerto que nos regalou. Inmenso.

Read Full Post »

Older Posts »