Alumnado do Ies Beade teñen a honra de facer música cos profesores da E-trad.

Un ano máis, e xa van dous ou tres, os profesores da Escola de Música Tradicional de Vigo ofrecéronnos nun concerto didáctico a posibilidade non só de coñecer os principais instrumentos da nosa música tradicional senón que ademais uns cantos alumnos privilexiados puideron tocalos e facer música cos profesores. Algúns dos profesores son:

• Rodrigo Romaní, actual director da E-Trad e profesor de harpa céltica. Membro histórico de Milladoiro hoxe dirixe Sondeseu, despois dunha breve carreira en solitario hoxe colabora con Lizgairo e produce a outros músicos.

• Anxo Pintos, profesor na E-Trad de zanfona. Multi-instrumentista fundador de Mattocongrio xunto a Carlos Núñez e hoxe membro de Berrogüetto, un dos nosos grupos musiciais máis internacionais.

• Xaquín Xesteira (Xocas), profesor na E-Trad de gaita e gaiteiro de Treixadura.

• Javier Feixoo (Chisco), profesor na E-Trad de canto e de baile galego na Asociación Cultural O Fiadeiro.

• Alfonso Franco, profesor na E-Trad de violín e responsábel das cordas na Orquestra Sondeseu. Tocou para Milladoiro, Emilio Cao e Lizgairo entre outros.

• Carlos Quintá, profesor na E-trad de acordeón diatónico e músico da murga Linho do Cuco.

Un orgullo e un inmenso pracer.

Advertisement

Read Full Post »

Anxo Moure: o atrapacontos

A finais de outubro Anxo Moure estivo no noso Instituto ofrecéndonos unha escolma de contos solidarios. Contou historias protagonizadas por rapaces onde non hai paz e si fame. El leva adiante Bicis pola Paz, unha ongd que nace en Chantada (Galiza) no ano 1990. O obxectivo de Bicis pola Paz é fomentar o eco-transporte nos proxectos de desenvolvemento, Bicis pola Paz doa bicicletas a mestres, médicos, promotores de saúde, veterinarios…. en máis de vinte paises de América Latina, Asía e África, así como a inmigrantes no estado español. Grazas a unha bici un médico pode chegar a tempo a un parto para salvar a vida dunha persoa, un mestre pode atender máis escolas ou un inmigrante atopar e desprazarse a un traballo digno. Bicis pola Paz doa as bicicletas en base a demanda das comunidades locais e en colaboración con elas, adquirindo as bicis nos mesmos lugares de desenvolvemento dos proxectos co fin de fortalecer o tecido comercial local. Bicis pola Paz financia estas doazóns cos fondos recadados polo proxecto “Contos Solidarios” así coma cos fondos económicos aportados por colaboradores, institucións, fundacións…

www.contosolidarios.org

Read Full Post »